விண்வெளியில் அகலக் கண் திறந்திருக்கும் கேர்சளின் அசத்த வைக்கும் அதிசயங்கள்.

//கேர்சள் விண் தொலைநோக்கி.//

விண்வெளி ஆராய்ச்சியில் தனிக்காட்டு ராஜாவாக இருந்து வரும் அமெரிக்க நாசாவுக்குப் போட்டியாக ஐரோப்பிய விண்வெளி ஆராய்ச்சி நிறுவனம் (ESA) களமிறங்கி இருக்கிறது. அதன் விளைவாக விண்வெளி ஆராய்ச்சியில் இவ்வளவு காலமும் நாசாவின் கபிள் (Hubble) விண் தொலைநோக்கி கண்டு சொல்வதே விண்ணியல் ஆய்வில் வேதமாக இருந்து வந்தது.

ஆனால் இந்த நடைமுறையை கடந்த (2009) மே திங்கள் 14ம் நாள் விண்ணுக்கு ஏவப்பட்ட ஐரோப்பிய விண்வெளி ஆராய்ச்சி நிறுவனத்துக்குச் சொந்தமான இரட்டை விண் தொலைநோக்கிகளான கேர்சள் (Herschel)மற்றும் பிளாங் (Planck) மாற்றி அமைக்க ஆரம்பித்துள்ளன.

இதன் முதற்கட்டமாக பூமியில் இருந்து 1.5 மில்லியன் கிலோமீற்றர்களுக்கு அப்பால் விண்வெளியில் இருந்து கொண்டு கேர்சள் தனது கண்களை அகலத் திறந்து ஆய்வுகளை நடத்த ஆரம்பித்திருக்கிறது.



//கேர்சள் அனுப்பி வைத்துள்ள M74 எனப்படும் பூமியில் இருந்து 24 மில்லியன் ஒளியாண்டுகளுக்கு அப்பால் Pisces உடுத்தோகுதியில் உள்ள அகிலத்தின் 3 வெவ்வேறு குறும் மின்காந்த அலைகள் சார்ந்த படங்கள். இவை கேர்சளில் உள்ள SPIRE எனப்படும் உபகரணத்தின் உதவி கொண்டு பெறப்பட்டவை.//

கேர்சளின் தொழிற்பாடுகள் இன்னும் பூரணமாக ஆரம்பிக்கப்படாத போதும் கேர்சளில் உள்ள அதிநவீன சாதனங்களின் (HIFI, PACS and SPIRE) பகுதியான தொழிற்பாட்டுடன் கூடிய அதன் ஆரம்பக்கட்ட செயற்பாடுகளின் போது பிடிக்கப்பட்ட விண்ணில் உள்ள சாதாரண ஒளி அலைகளை விட பெரிய அலை நீளமுள்ள மற்றும் குறும் அலை நீளமுள்ல அலைகள் தொடர்பான படப்படிப்புக்கள் அகிலங்கள் (Galaxies) தொடர்பான மற்றும் நட்சத்திரங்களின் உருவாக்கம் தொடர்பான புதிய தகவல்களை தர ஆரம்பித்துள்ளன.

கேர்சள் பிடித்துத் தந்த படங்களின் பிரகாரம் தூசிகள் அடங்கிய முகில் கூட்டங்களால் நிறைந்து கிடக்கும் சுருளி வடிவ தூர அகிலம் ஒன்றில் தூசிகளில் இருந்து நட்சத்திரங்கள் பிறப்பெடுப்பது அவதானிக்கப்பட்டுள்ளது. அதுமட்டுமன்றி இது ஒரு சக்கரச் சுழற்சியாக மீள மீள நிகழ்வதாகவும் பெறப்பட்ட தரவுகளில் இருந்து ஆய்வாளர்கள் அனுமானித்துள்ளனர்.



இதற்கிடையே கேர்சளின் HIFI உபகரணம் தந்த தரவுகளில் இருந்து உடுத்தொகுதி Cygnus இல் நட்சத்திர பிறப்பின் போது ஏற்றம் கொண்ட காபன், காபனீர் ஒக்சைட் மற்றும் நீராவி போன்ற இரசாயனங்களின் இருப்புக்கான ஒளி காழற் பகுப்புப் படங்கள் (light spectrum) பெறப்பட்டுள்ளன என்பதும் இங்கு குறிப்பிடத்தக்கதாகும்.

அமெரிக்க நாசாவின் கபிள் சாதாரண ஒளி அலைகளுக்குரிய விண்வெளி நிகழ்வுகளை கூறுகளையே படம் பிடிக்கும் தகுதியுடையது. ஆனால் கேர்சள் அதை விட அலை நீளமுள்ள மற்றும் பல்வேறுபட்ட அலை நீளமுள்ள வேறு மின்காந்தக் கதிர்ப்புக்களையும் உள்வாங்கி தரவுகளை பெறக்கூடிய தன்மையுடையதாக பல அதிநவீன உபகரணங்கள் உள்ளடக்கப்பட்டு வடிவமைக்கப்பட்டுள்ளது.



//கேர்சள் படம்பிடித்த M66 எனப்படும் பூமியில் இருந்து 36 மில்லியன் ஒளியாண்டுகளுக்கு அப்பால் Leo உடுத்தொகுயில் உள்ள சுருளி அகிலத்தின் அமைப்பு.//

கேர்சளின் நீண்ட ஆராய்ச்சிப் பயணத்தில் இந்த அகலக் கண்திறப்பு இப்போ ஆரம்பக்கட்டத்தில் இருந்தாலும் அதற்கென தீர்மானிக்கப்பட்டுள்ள ஆயுள் காலமான 2013 க்குள் அது விண்வெளி பற்றிய பல வியத்தகு விடயங்களை பூமிக்கு தந்துதவும் என்று ஐரோப்பிய விண்வெளி ஆராய்ச்சி நிறுவன விண்ணியலாளர்கள் நம்புகின்றனர்.

கேர்சளின் செயற்பாடுகள் விண்வெளி பற்றிய பல கேள்விகளுக்கு பதிலளிக்கும் வகையில் இருக்கும் என்று பிற விஞ்ஞானிகளும் நம்புகின்றனர்.

கேர்சளின் மற்றும் பிளாங்கின் செயற்பாடுகள் தொடர்ந்து வெற்றிகரமாக அமைந்து அவை விண்வெளி அறிவியலுக்கு புத்தூட்டம் வழங்குவதை சாதாரண மக்களாகிய நாமும் வரவேற்கின்றோம்.



//கேர்சள் அனுப்பிய படங்களின் தொகுப்பு. இதில் கீழ் இடப்பகுதியில் Cat's Eye Nebula பற்றிய முப்பரிமானப்படங்கள் அடங்கி இருக்கின்றன. image: http://sci.esa.int//

மேலதிக படங்களும் விபரங்களும் இங்கு. (படங்கள் தகவல் bbc.co.uk மற்றும் sci.esa.int/science-e)

உடலுக்கு வெளியில் ஆண் உயிரணுக்களை உருவாக்கி விஞ்ஞானிகள் சாதனை.

மனித ஆணின் உடலுக்கு வெளியில், IVF முறையில் உருவான முளையம் ஒன்றில் இருந்து பெறப்பட்ட மூலவுயிர்க்கலங்களைப் பயன்படுத்தி ஆண் உயிரணுக்களை முழுக்க முழுக்க ஆய்வுசாலையில் உருவாக்கி சாதனை படைத்திருக்கிறார்கள் உயிரியற்துறை விஞ்ஞானிகள்.



உலகின் முதல் குளோனிங் செம்மறியாட்டை உருவாக்கிய பிரித்தானிய நியூகாசில் பல்கலைக்கழகத்தைச் சேர்ந்த விஞ்ஞானிகளே இந்தச் சாதனையையும் படைத்துள்ளனர்.

IVF முறையில் உருவாக்கப்பட்ட முளையத்தில் இருந்து பெறப்பட்ட மூலவுயிர்க்கலங்களை திரவ நைதரசனில் சேமித்து வைத்து பின் அவற்றை சரியான வளர்ப்பூடகத்தில் மனித உடல்வெப்பநிலைக்கு நிகரான வெப்பநிலையை பரிகரிக்கக் கூடிய பரிகரிப்பானில் வைத்து வளர்த்து இந்த ஆய்வுசாலைக்குரிய ஆண் உயிர் அணுக்களை உருவாக்கியுள்ளனர்.

இருந்தாலும் இந்த உயிரணுக்கள் முழுமையான வளர்ச்சியைக் காண்பிப்பதாகக் கருதக் கூடிய அளவுக்கு சமர்ப்பிக்கப்பட்ட தரவுகள் தெளிவாக இல்லை என்றும் இது இம்முயற்சியில் ஒரு ஆரம்பப்படி நிலை வெற்றியே என்றும் கூறுகின்றனர் பிற விஞ்ஞானிகள்.

இந்த முறையில் ஆண் உயிர் அணுக்களை உருவாக்குவதில் உண்மையில் வெற்றிகிட்டியிருக்குமானால், வாழ்க்கைக் காலத்தில் நச்சு இரசாயனங்களால் அல்லது பிறப்பால் மலட்டுத்தன்மையை பெறும் ஆண்களுக்கு அதனை நீக்கி எதிர்காலத்தில் குழந்தைகளை உருவாக்க வழி பிறக்கலாம் என்று கருதுகின்றனர் இவ்வாய்வு தொடர்பாக கருத்து வெளியிட்டுள்ள ஆய்வாளர்கள்.

உலக சனத்தொகை அபரிமிதமாகப் பெருகி வரும் இன்றைய உலகில், இன்னொரு மூலையில் குழந்தைகள் இல்லாது கவலைகளோடு வாழும் மனிதர்களுக்கும் உயிரியலுக்கும் இந்த ஆய்வு நல்ல பயனளிக்கும் என்பதை மட்டும் இப்போதைக்கு ஏற்றுக்கொள்ளலாம்.

மேலதிக தகவல் இங்கு.

நாளும் உடலுறவு கொண்டால் நல்ல வளமான ஆணணுக்கள் உருவாகுமாம்.

ஆண்கள் தினமும் அல்லது இரண்டு தினங்களுக்கு ஒரு முறையாவது உடலுறவு கொண்டால் அவர்களால் வளமான ஆணணுக்களை அதிகம் உருவாக்க முடியும் என்று அவுஸ்திரேலிய ஆய்வில் கண்டறியப்பட்டுள்ளது.

ஆண்கள் அதிக நாள் இடைவெளியில் உடலுறுவு கொள்வதால் அவர்களின் விந்தணுக்களில் உள்ள டி என் ஏ (DNA) மூலக்கூறுகள் சிதைவடைய அல்லது பாதிப்படைய அதிக வாய்ப்புள்ளதாகவும் அதேவேளை தினமும் உடலுறவு கொள்வதன் மூலம் புதிய விந்தணுக்கள் உருவாக அதிக சந்தர்ப்பம் அமைவதோடு டி என் ஏ யில் ஏற்படும் பாதிப்பும் சுமார் 12% குறைவடைவதாகவும் இந்த ஆய்வில் கண்டறியப்பட்டுள்ளது.

இளம் ஆண்களைப் போன்று வயதான ஆண்கள் அதிகம் உடலுறவில் நாட்டம் காட்டுவதில்லை என்றும் இதுவும் பெண்கள் குழந்தைகள் பெற்றுக் கொள்வதில் பிரச்சனைக்கு காரணமாக அமைகின்றதாகவும் மேற்படி ஆய்வில் ஈடுபட்ட விஞ்ஞானிகள் தெரிவித்துள்ளனர்.

ஆனால் தினமும் உடலுறவு கொள்வது என்பது எல்லோராலும் சாத்தியப்படக் கூடிய விடயம் இல்லை என்றும் அதுமட்டுமன்றி தொடர்ச்சியாக (உதாரணத்துக்கு 14 நாட்கள்) உடலுறவு கொண்டால் இயற்கையாகவே ஆணணுக்களின் எண்ணிக்கையில் பெரிய வீழ்ச்சி காண்பிக்கப்படும் என்பதாலும் வாரத்துக்கு இரண்டு அல்லது மூன்று தினங்கள் உடலுறவு வைத்துக் கொள்வது வளமான விந்துருவாக்கத்துக்கும் குழந்தைகள் உருவாக்கத்துக்கும் அதிக வாய்ப்பளிக்கும் எங்கின்றனர் ஆய்வாளர்கள்.

தினமும் உடலுறவு வைக்கப் பரிந்துரைப்பதிலும் குறிப்பாக பெண்களில் மாதவிடாயின் பின்னர் 12 தொடக்கம் 14ம் நாளில் முட்டை வெளியேற்றம் நிகழ்வதால் அந்த நாட்களில் தினமும் உடலுறவு வைப்பது வளமான விந்தணு முட்டையோடு சேர அதிக வாய்ப்பை அளிக்கும் என்கின்றார்கள் இவ்வாய்வு குறித்து கருத்து வெளியிட்டுள்ள பிற ஆய்வாளர்கள்.

பொதுவாக விந்தணுக்கள் விரைவில் பாதிப்படையக் கூடிய இயல்பைக் கொண்ட உயிரணுக்களாக விளங்குகின்றமை இங்கு குறிப்பிடத்தக்கது. அவை அதிக உடல் வெப்பநிலையைக் கூட தாங்கக் கூடியவை அல்ல. அதுமட்டுமன்றி விந்தணுக்களை உடலுக்கு வெளியில் விந்தணு வங்கிகளில் சேமிக்கும் போது கூட அவை பிற இரசாயனக் கூறுகளால் விரைந்து பழுதடையச் செய்யப்படுகின்றன என்றும் தெரிவிக்கப்படுகிறது.

முக்கிய குறிப்பு:

இந்தச் செய்தியை படித்துவிட்டு வீட்டில் ஆத்துக்காரிக்கு தொந்தரவு கொடுப்பது ஏற்புடையதல்ல. ஏனெனில் இந்த ஆய்வு பொதுமக்களுக்கு பரிந்துரைகளை வழங்க முன் இன்னும் பல நிலைகளூடு ஆய்வு செய்யப்பட வேண்டிய ஒன்றாக இருக்கிறது எங்கின்றனர் ஆய்வாளர்கள். அதுமட்டுமன்றி ஒரு பெண்ணின் இயற்கையான நிலைக்கு மாறாக அவளை உடலுறவுக்கு கட்டாயப்படுத்துவது குற்றச் செயலாகும். அதேபோல் பெண்களும் ஆண்களை கட்டாயப்படுத்துதல் தவறாகும்.


மேலதிக தகவல்கள் இங்கு.

வெப்ப வலய பாலூட்டிகள் விரைந்து கூர்ப்படைகின்றன.

மரபணு மூலக்கூற்று அறிவியல் வளர்ச்சியின் பின் உயிரினக் கூர்ப்புப் பற்றிய பல ரகசியங்கள் பரகசியமாக்கப்பட்டிருக்கின்றன.

அந்த வகையில் தற்போது நடத்தப்பட்ட ஆய்வொன்றில் இருந்து வெப்பமான காலநிலை உள்ள பிரதேசங்களில் வாழும் பாலூட்டி வகை உயிரினங்களில் ஒரே இன அங்கத்தவர்களுக்கிடையே கூட அதிக அளவில் மரபணு சார்ந்த கூர்ப்பு நிகழ்வதாகவும் இது குளிர் காலநிலை உள்ள பகுதிகளில் வாழும் பாலூட்டிகளை விட 1.5 மடங்கு அதிகமாக இருப்பதாகவும் கண்டறிந்துள்ளனர்.

குறிப்பிட்ட வீச்சுக்குள் வெப்பநிலை அதிகரிப்போடு கல அனுசேபச் செயற்பாடுகள் அதிகரிப்பதால் அதனுடன் தொடர்புபட்டு தாவரங்களில் மற்றும் கடல் வாழ் உயிரினங்களில் அவதானிக்கப்பட்டிருந்த இவ்வகைக் கூர்ப்புக்கள், சீரான உடல் வெப்பநிலையைக் கொண்ட பாலூட்டிகளிலும் சூழல் வெப்பத்தின் தாக்கம் சார்ந்து அதிக அளவு கூர்ப்புக்கள் நிகழ வாய்ப்பு இருப்பது இப்போதே முதன்முறையாக அவதானிக்கப்பட்டிருக்கிறது.

உயிரினங்களில் வெப்ப காலத்தில் குளிர்காலத்தை விட அதிகளவு புணரிக்கலங்களான விந்து மற்றும் முட்டைகள் உருவாக்கப்படும் நிலை காணப்படுவதும் அவதானிக்கப்பட்டிருக்கின்றது. உயிரினங்கள் மத்தியில் காணப்படும் இதுபோன்ற செயற்பாடுகளும் மரபணு மூலக்கூற்று (DNA) மாறல்கள் சார்ந்த கூர்ப்புக்கு அதிகம் உதவி அளிக்கக் கூடும் என்றும் கருதப்படுகிறது.

மேலதிக தகவல் இங்கு.